مرت سنة من يوم زايد صرت غايب عني          
          و القلب في فرقاك شيخي تشتعل نيرانه
          
          
ما كنك إلا الشمس زايد و الكواكب كني          
          من غبت عني كوني أظلم و ابهتت ألوانه
          
          
من غمضت عينك عيون الناس هي تسألني          
          يا دار زايد من بيروي روحك العطشانه ؟!
          
          
يا دار زايد اسمي اللي القلب به متهني          
          لانك لاسمي بو خليفه فخره و عنوانه
          
          
ماتت بصدري من سنه أنغام فرحي و فني          
          لان الفرح من صوتك انته يستمد ألحانه
          
          
حتى السعادة سيدي عقبك تبرت مني          
          كل الهنا في دنيتي سديت أنا بيبانه
          
          
ما جف دمعي من عيوني زايد و لكني          
          صبري وعزاي بمن حمل عهد الرجال وصانه
          
          
خليفه اللي بوسط عينه و خافقه سكني          
          و مكتوم يا اللي له سند وافي مع اخوانه
          
          
ما غيروا نهجك أبد ما خاب فيهم ظني          
          من أجل مصلحة الشعب عيونهم سهرانه
          
          
أزهار خيرك سيدي ما فارقت هي غصني          
           محد رضى انها تكون ف يوم هي ذبلانه
          
          
نام و تطمن سيدي نام و توسد حظني          
          ما زال طير العز فيني يصفق بجنحانه
          
          
يرحمك ربي سيدي يجزيك خير عني          
          تنعم و تتمتع و تحيا ف روضته و جنانه