سمو الشيخ لك قاف الشِّعر يصطف في إجلال
وْتِتْسَابَقْ حروفه لاجل تحظى بالسَّبِقْ وِ تْنول
ولكن أربع حْروفٍ مقَدَّرْ للصداره تْنَال
لها كاس الشَّرَفْ يا سَيِّدي والنصر لك مَرْسول
الاول (ميم) بَعْده (الحاء) وْبَعْدهْ (الميم) بَعْده (الدال)
نَعَمْ زانت بإسمك سَيّدي به تَفْتِخِرْ وِتْجول
محمد ابن راشد بِنْ سِعِيْد المَدْح بك يختال
(محَّمد) لى تبدّي الفعل قبل لا ينْجلي لك قول
نشوف (الشيخ زايد) فيك أخلاقٍ وطوْلَةْ بال
وْحِكْمه وْ نَظْره بْعيده وْ سيفٍ عَ الظِّلِمْ مَسْلول
نشوف (الشيخ راشد) فيك متمثِّلْ فِكِرْ وافعال
تحدّى المستحيل وكل صعبٍ في طريقه يْزول
(خليفه) قايد الدوله على كتفه الأمانه شال
وْصِرْت يْمينه يا (مْحَمَّدْ) وْ نِعْم النايب المسؤول
سمو الشيخ يا فَخْر العَرَبْ يا باني الأجيال
نجاحك مدْهِشْ العالَمْ نَعَمْ و الكِلْ بك مَذْهول
نِلف الشرق والاَّ الغَرْب والاَّ جْنوب والاَّ شْمَالْ
صدى أسمك ملا العالَمْ نَعَمْ والله عرض وْ طول
سياسي مْمَيَّزْ بْرايك لك الراسخ من الأقوال
شعارك هالسلام يْعِم وْ يِتْدَفَّقْ مطَرْ وِسْيول
حكيم ولك فِكِرْ صايب وأمرك نافِذٍ في الحال
وجود الياس في منهَجْك (بو راشد) مَهِبْ مَقْبول
وفارس في ميادين التحدّي واوَّل الأبطال
تِفز لاجلك نَعَمْ فرسان يا (مْحَمَّدْ) نَعَمْ وِخْيول
وشاعِرْ لغْزِكْ يْحَيِّرْ له أسْلوب وْمَعَاني جْزال
ويثري ساحة الشِّعْر بْقصايد مثمره بِحْلول
وكفّك سيّدي مثل السحاب الماطر الهَمَّال
حشا ما جاك أحَد يا (مْحَمَّدْ) وْ عَنّك رجَعْ مَخْذول
كتابك (رؤيتي) غيثٍ من مْزون التميّز سال
ومنهج للتفوّق واضح وْ مِنْه أرتوَتْ اْلِعْقول
(دبي) صارت لهَالعَالَمْ (محمَّد) معجزه وِمْثَال
بأن المستحيل أصبَحْ نَعَمْ واقع وْ شَي مَعْقول
يا سِيْدي المجد في عهدك لِبَسْ له غِتْرةٍ وِعْقَال
وصار يْصَرِّحْ وْ يحكي بْلِسَانٍ يعربي مَعْسول
يكفّي الشَّعْب (بو راشد) تمر تِتْفَقَّدْ الأحوال
يكفِّي الشِّعب انّك عَنْه أبَدْ و الله هب مَشْغول
يكفّي الشَّعب إذا تْمَنَّى يلاقي بْعينك الآمال
يكفّي انّه على بابك تلاشت كلمة المقفول
رعاك الله (بو راشد) فدَتْك الروح والأموال
رعاك الله يا شيخٍ على طبع الوفا مَجْبول
دعينا الله رب الكون منزِّلْ طه والأنفال
عسى عمرك يا (بو راشد مْحَّمْد) بالسعاده يْطول
