انكان حظك مافرشلك وغطاك
لاترتجي من حظ غيرك يغطيك
وان عاندك سلم امورك لمولاك
واصبر على الشدات وارفع هقاويك
اياك لاتشكي على الناس دنياك
يفرح عدوك يوم يدري ابلاويك
ولياكبرت وصار ابنك وجافاك
يمكن تجيلك فزعةٍمن بني اخيك
مادام رزقك كاتبه يوم سواك
خلك صبور وقاسم الرزق يعطيك
لاتزهد الدنيا اذا الرزق ماجاك
وان جاك رزقك لايغرك ويطغيك
وصون الصحيب اللي على الروح بداك
والله يالولا طيبتك مايبديك
احفظ وداده واجعله من عناياك
لياراح منهو في غيابه يسليك
احذر حسودك دونما ذنب عاداك
لوتطعمه شهد النحل كود يشنيك
ياساعيابالشرلاطالت خطاك
ارفع يديني لوالي العرش يفنيك
كثر العيال وطايل الرزق مااغناك
مايملي عينك كود قبرٍ يآويك
احفظ حقوق اللي على الطيب رباك
ابوك هذا ويسعده ان يفتخر فيك
ان جاك عارض يسهر الليل يرعاك
تذرف عيونه لين ربك يشافيك
وشما عطت يمناك تاخذ بيسراك
الطيب دين ولابد ابنك يوفيك
واسمع رسول الله بالضيف وصاك
احفظ وصيته واسمع لما يوصيك
اخوك يوم انك نخيته تلقاك
بالطيب والاحسان جاوب نخاويك
ذخرك اذا ماشان وقتك ووازاك
ان عافتك كل الملا مايخليك
واحفظ حقوق الجار لو جار وياك
اغمره بطيب وشوف ماينبهر فيك
واحذر ابليس اللي على الدوم يبراك
لولا الصلاة وكثرة الذكر يغويك
طيع المود اللي عن الشر ينهاك
هذاك لوشاف الخطا مايجاريك
وارجع اقول انكان حظك تناساك
لاترتجي من الناس حظٍ يغطيك
