بسم الله الرحمن الرحيم
لاعادك الله ياضحا يوم الاثنين
يوم ٍ تغشاه الكدر والعتامه
يوم انفجعت بما يذيع المذيعين
واهتز معلوق الحشا من مقامه
كني حضرت ابحرب سبعه وستين
وادركت نكستها وذقت الندامه
لا والله الا فوق نكسه وفوقين
حزني وفوق الكارثه والملامه
علم ٍ فجع كل العرب والمسلمين
والكون كله من جنوبه لشامه
وانتثرت الدمعه على سور برلين
من قبل لاتبكي عليه المنامه
مات الزعيم اللي شهد له ملايين
لاسمعوا اسمه وقفوا لاحترامه
القايد اللي ينحسب في الميادين
فهد فهد تاج الحكم والزعامه
قايد وترجح كفته بالموازين
يظهر على مليون هامه وهامه
كم دولة يسهر على همها لين
يزول عنها ليلها والعسامه
وكم ٍ ظالم خلا خياره بثنتين
اما يحق الحق والا النقامه
وكم لان جنبه للضعوف المساكين
وكم غردت بمبادراته حمامه
يكفيه بانه خصه الله ببيتين
باع اللقب لاجل ايخدمهم اخدامه
وتكفيه فزعاته على العسر واللين
يشهد له اللي جربه في صدامه
حتى مماته شاهد ٍ بالبراهين
سبحان ربي كيف سير نظامه
في اليوم نفسه عام واحد وتسعين
اقسم بربه والوعد في كلامه
انه يرد اهل الكويت العزيزين
لديارهم قال ابشروا بالسلامه
شل الامانه وارتكى ناصر الدين
ايلين ثبت ركنها باهتمامه
والله لو اكتب لفقده دواوين
ماتكفي انهار الحبر والقلامه
ياجعل جنات العدن والرياحين
منزال ابو فيصل وتبرد اعظامه
واسّين يادمعٍ على قبره اسّين
من عين عبدالله كواني حطامه
يبشر بنا حنا له اسيوف وايدين
وحنا له اسيوف الولا والكرامه
يبشر بنا دونه له احجاب وانبين
عهد ٍ لابوه نجدده بالتزامه
حنا على البيعه ولامره موالين
وايلا تعزوى يام شدة احزامه
