كل يهني في أول العيد خلّه
وانا تركت معايد العيد ثاني
ما هو تناسي ولا بلاشواق قلّه
لكن وربي لحاجتن في جناني
ودي أزيدك في انتظاري تولّه
وتقول زحمه ما ذكرني ونساني
حوله هله صحبه وكلن وصل له
كل الحبايب معه وش له يباني
أو إنّ وجهي من مقابلهِ ملّه
سكّن بدالي وعن فؤاده نفاني
ما عاد مغرم بي ودمعه يهلّه
أصبح عديم احساس والحب فاني
لا ينشغل بالك وقلبك تذلّه
وتقول خلي بعد حبه جفاني
واجيك ثاني العيد بالشوق دلّه
واقهويك منها دعاء وتهاني
العيد عيدك والهوى في محله
لا ما تغير شي وعود وأماني
انته غلا قلبي وروحي ودلّه
ما أنجبت مثلك نساء بزماني
يا ويح قلبي في ارتحاله وحله
وشلون بنسى ناعسات العياني
والله أحلف وأقسم أيمان بالله
إنك لقلبي ما تفارق ثواني
أجلت أنا معايدك من دون علّه
لاسباب ما تبعد ذراب المعاني
ودّي اتفرّغ لي عن الكون كله
واعايدك وحدي لو العيد ثاني
