بذرت الحب في قلبن عسى ينبت وله واشواق
أتاري بذرتي ماتت قبل لا تحضن ترابه
تركني أسقي واحرث وتمضي بي السنين سباق
إلين اتشبّع فؤاده .. رماني رمية كلابه
عطيته كل ما عندي وجازاني العطى بفراق
محى ذكري من لسانه غرس في قلبي انيابه
كأني ما عطيته يوم من حبي وهو ما ذاق
حلاوة قلبي الموهوم في حبه وترحابه
يقول ان المحبة فن .. وطبع الفن له اذواق
واذا ذوقي رفض حبك فلازم نقطع اسبابه
حسافة يازمن تركض ولا ترحم عليل الساق
تعب من خطوته يمشي ما بين اسود وذيابه
عجيبة كيف هالدنيا تعكر صفوة المشتاق
بعد ما كان في فرحة طرق ريح الحزن بابه
زمن قاسي على شخص ٍ غفا لحظه ولما فاق
لقى نفسه مع نفسه مابين حروفه وكتابه
يناجيها ويسامرها .. ويشكي همه للأوراق
لانـه يدري الأوراق مـا تـزعـل لاعـتـابـه
بذرت وناطر ان الوقت يفتّح زهرة العشّاق
أتـاري بذرتي ماتـت قبل لا تحضن ترابه
